Rabu, 01 April 2009

Renungan Jumat Agung 2009


Binohe Susi Su ellong petatahendungang
Kapapohongu Mawu Yesus Su sambaiang mawantuge


YOHANES l9 : 28 – 30 (Pdt.A.Makasar,M.Th)

Jamaatu Mawu dikekemdage ..!
Pitung kamisa metetatuhu su pangangimang nasuku taumatang sahani dimaleng timole likurang Mawu Yesus nemikule bawawaengu kasasigesa, ku lahe e nawuna bue su wongkong Golguta tampa ni penguruleengu papate. Sahelo ini dunia kimendung batuu kalu pinekehuse nipasaeng kai nipake nipengantongang Mawu sarang pulisu papatene. Kai isai tamegilabe tamakapeto mompe u ello mata, Mawu ene e satiane nepaduli dunia ku kawe bawalise niapakahombangu papate tawe aregane. Kalu pinekehuse nipake su kapapohong nipetatude nakoa tialang sasambangu kakiwalong kasasigesau patiku traumata satia tumole si Kristus sarang papatene. Ualing ene sue long petatahendungangu kapapohong Mawu Yesus sahelo ini, mahi e ikite manarima tentirong pangangimang su kalu pinekehuse nakoa bawawaeng maweha sidutu nipasaeng sarang pengengsuengu pebawiahe.

Jamaatu Mawu dikekendage…!
Su ellong sambaiang ene, ku endai iseseba ellong kapapohong pia isire epa namasaeng kalu pinekehuse/kalung kuruise makoa tiala tatuleng kite ku makaena monara kapapohong I Kristus.

Taumata humotong nemasaeng kuruise ute ianu digantong su sembeka kaihi, isie kai traumata napeneu sungkalange mekekoa patiku tawe ikekapulung Mawu su pebawiahe, ku sarang papatene nigantong su kalu kuruise tawe apa pesasesile, tawe petatobate ku lembone lai kai nipesalang Mawu Yesus su kawasane, uade kai tawe nakaliwire sisire bou silaka himombang su kotou kalu pinengantongang. Bou kalu kuruise ene isie tanakahombang karalunsemahe, tanakahombang kasasalamate batuu isie tawe apa pedarame diangangu Mawu. Isie tanakahombang kalaliwire bou rosane.

Taumata karuane nemasaeng kuruise, ianu nigantong su sembeka koanengu Mawu yesus, isie netengong Mawu Yesus ku namea bawangenge batuu isie kai traumata waradosa tawe hinone maene dingangu Mawu Yesus su tampa pengagantongang. Su penanarakangu watangeng isie nakahombang kalampung bou rosane, su tengong Mawu Yesus isie nedorong kamageng Mawu Yesus makoa datung salamate tahendunge wue ia. Kalu kuruise nipasaeng nebawa sisie nakapesombang dingangu Mawu, ku ndai sne isie nakahombang karalunsemahe.

Taumata katelune nemasaeng kuruise, ianu wuhue nikasilo narenta bou soa baline ku iseseba si Simon bou beou Kirene, ku mesulungu nipetatude nipemasaeng kalu pinekehuse ene dingangu nipelo su wembange, isie bega mensang apa timonane ndai ene. Kalu kuruise ndai kerene makoa dalenteengu daralengangu pebawiahu taumata magimang. Isie namasaeng kalu kuruise kai nagambang pesasitori ku ualingu satiane I Simon nakapasaeng kalu ene sarang bongkong Golguta, I sie nakaeba Mawune, nakahombang si Kristus.

Taumata kaepae nemasaeng kuruise, taweu waline ute Mawu Yesus sesame, dingangu satiane tadeau kebi patiku taumata makahombang karaliwire. Isie nipaku su kalu ene nenarakang batangeng takadeakengu patiku taumata makahombang kasasalamate dingangu maliu bou silaka u papate.

Su ello mawantuge ini ikite lumiage su sasombou pangangimang baugu monara maselahe nikoa u Mawu Kaselaheng nangaliung patiku pesasala ku I kite nibawawa sarang pebawiahe napeneu karalunsemahe.
Kariang kamang apang mamasaeng kalu kuruise, ku makaene pelesang Mawu neliu si kite bou kasasigesa. Kalu kuruise kai tiala Mawu mepepaduli sentinia taumata mebebiahe su kasasigesa, mesulungu bungang u aghe niuno su anggore ni inunge. Aming.

Tidak ada komentar:

Posting Komentar